Gullfaks frå Hydro til Statoil

Statoil si overtaking av Norsk Hydro sin olje- og gassdivisjon var eit resultat av ei større omstrukturering i norsk oljeindustri, ei endring som hadde gått føre seg heilt sidan Saga Petroleum blei oppløyst i 1999.

I samband med fusjonen endra Statoil namn til StatoilHydro, ei endring som varte fram til 1. november 2009, då selskapet gjekk tilbake til å berre heitte Statoil.

Namneendringa var nok det som var mest merkbart for dei tilsette på dei tre Gullfaks-plattformene, all den tid skilt og arbeidsklede fekk nye logoar.

I styrerommet hadde StatoilHydro (seinare Statoil, deretter Equinor) sin eigardel auka frå 61 til 70 prosent, medan Petoro sin eigarpost stod fast på 30 prosent. Trass i at Statoil med denne eigarposten hadde reint fleirtal, kravde vedtektene framleis at minst to selskap måtte vere samde i alle avgjerder.

Denne situasjonen med tvungen semje var rådande fram til 2013. Då reduserte Statoil sin eigarpost med 19 prosentpoeng, til fordel for det austerrikske selskapet OMV.