Måned: februar 2026

Formålet med prosjektet har vore å dokumentere Gullfaksfeltet og området rundt, noko som mellom anna inkluderer røyrsystem og andre felt som sender olje og gass til Gullfaks-plattformene.

Dokumentasjonen omfattar mellom anna politiske og økonomiske vurderingar rundt Gullfaks-området, utbygging av området, livet på plattform og samhandling med land.

Samhandling med land omfattar i sin tur mellom anna oljefrakt og -sal, forsyningsbasar og forsyningsskip, samt oppbygginga av Statoil Bergen.

I løpet av prosjektperioden har vi besøkt plattforma Gullfaks A, forsyningsbasen på Mongstad (CCB Mongstad) og Equinor sitt kontor på Sandsli, Bergen.

Prosjektet har resultert i godt over 170 artiklar, i varierande grad illustrert med foto, illustrasjonar, grafar og tabellar, samt med lenker til informasjon om gjenstandar.

Dokumentasjonsprosjektet Industriminne Gullfaks inneber meir enn det som blir presentert på nettsida.

Bilete, gjenstandar, dokument og anna som ikkje blir vist, blir tatt vare, til framtidig forsking og som kjelder til vårt felles historieminne.

Nettsida kan ikkje inkludere alle bilete og film som vi har. Det er praktiske grunnar til det, gitt til dømes nettsida si utforming og kvaliteten på foto. Ei anna årsak kan vere personvernet til dei som er avfotografert.

Målet med nettsida er at den skal gje ein smakebit av det som vi har samla inn og dokumentert i prosjektet, samt at den skal kunne vise vegen til kvar stortingsproposisjonar, aviser, tidsskrifter, bøker om Gullfaks og andre kjelder, kan lesast i sin heilskap.

Mange av desse kjeldene finst tilgjengeleg i våre arkiv, hjå Nasjonalarkivet (tidlegare Arkivverket), hjå Equinor eller i mange tilfelle: hjå Nasjonalbiblioteket.

Vi har gjennom prosjektet hatt samarbeid med Nasjonalbiblioteket og Nasjonalarkivet, i tillegg til samarbeid med Gullfaks-lisensen, ved Equinor.

Vidare har vi hatt samtalar med mange og gjort intervju, noko som har bidratt til å styrke den immaterielle kulturarva knytt til Gullfaks-området generelt og norsk oljehistorie generelt. Forhåpentlegvis har vi fått fram litt fleire sider knytt til korleis det er å arbeide på ei plattform eller korleis ein forsyningsbase fungerer.

Mange har delt frå sin kvardag. Dei har forklart om hendingar dei har vore med på, delt korleis utviklinga av ein ny dings eller eit nytt system blei til eller forklart oss korleis dei gjer arbeidsoppgåvene sine.

Tusen takk til alle som har tatt seg tid til å snakke med oss, ingen nemnt og ingen gløymt.

God lesing!